అప్పని వరప్రసాది - తాళ్లపాక చినతిరుమలాచార్య
రాగము: సాళంగనాట
పల్లవి:
అప్పని వరప్రసాది అన్నమయ్యా
అప్పసము మాకె కలఁ డన్నమయ్యా
అర్థం:
శ్రీహరి (అప్పని) వరప్రసాదాన్ని పొందిన మహనీయుడు అన్నమయ్య. అలాంటి అన్నమయ్య మాకు అండగా (ఆసరాగా) ఉన్నాడు.
చరణం 1:
అంతటికి నేలికైన ఆదినారాయణుఁ దన
యంతరంగాన నిలిపీ నన్నమయ్యా
సంతసానఁ జెలువొందె సనకసనందనాదు
లంతటివాఁడు తాళ్లపాకన్నమయ్యా
అర్థం:
సమస్త లోకాలకు ప్రభువైన ఆదినారాయణుడిని తన హృదయంలో నిలుపుకున్నవాడు అన్నమయ్య. సనక, సనందనాదులైన మునులంతటి గొప్ప జ్ఞాని తాళ్లపాక అన్నమయ్య.
చరణం 2:
బిరుదు టెక్కెములుగా బెక్కు సంకీర్తనములు
హరిమీఁద విన్నవించె నన్నమయ్యా
విరివిగలిగినట్టి వేదముల యర్థ మెల్లా
అరసి తెలిపినాఁడు అన్నమయ్యా
అర్థం:
భగవంతునిపై ఎన్నో సంకీర్తనలను బిరుదులు, టెక్కెముల (ధ్వజాల) వలె హరికి సమర్పించి కీర్తించినవాడు అన్నమయ్య. అలాగే, విస్తారమైన వేదాలలోని పరమార్థాన్ని అందరికీ స్పష్టంగా అర్థమయ్యేలా వివరించిన వాడు అన్నమయ్య.
చరణం 3:
అందమైన రామానుజాచార్యమతమున
అందుకొని నిలిచినాఁ డన్నమయ్యా
విందువలె మాకును శ్రీవెంకటనాథుని నిచ్చె
అందరిలో దాళ్లపాక అన్నమయ్యా
అర్థం:
శ్రీ రామానుజాచార్యుల భక్తి మార్గాన్ని (మతాన్ని) స్వీకరించి ఆచరించినవాడు అన్నమయ్య. మా అందరికీ శ్రీ వేంకటేశ్వరుని ఒక దివ్యమైన విందు వలె అందించినవాడు తాళ్లపాక అన్నమయ్య.
No comments:
Post a Comment